Dyzet studentë shqiptarë nga Zvicra, kanë vizituar këto ditë ngulimet shqipfolëse të Siçilisë. Studentët, shumica me prejardhje nga Kosova, dhe të gjithë të brezit të dytë, kanë zhvilluar, ndër të tjera, një bisedë në Sallën e Bibliotekës bashkiake të ngulimit shqipfolës të Sëndastinës (Santa Cristina Gela) me studiuesin arbëresh Mateo Mandala. Ngulimet shqipfolëse në Jugun e Italisë, me kryqendrën Hora e Arbëreshëve (Piana degli Albanesi) u krijuan pas humbjes së Skënderbeut dhe vendosjes përfundimtare të osmanëve në Shqipëri. Një pjesë e popullatës, përfshirë edhe shumë fisnikë arbër, u zhvendosën në Jug të Italisë në bazë të një marrëveshjeje me mbretin e Napolit.