Përkeqësimi i situatës në dy spitalet e para me pacientë të infektuar me koronavirus ka bërë që Covid 3 të hapë dyert këtë të shtunë të 31 tetorit. Spitali Covid 3, gjendet në godinën e ish-Kirurgjive, në brendësi të Qendrës Spitalore Universitare Nënë Tereza.
Struktura e re ka një kapacitet prej 150 shtretër dhe një njësi Reanimacioni. Për t’u ardhur në ndihmë pacientëve, të gjitha dhomat e spitalit Covid 3 janë pajisur me respiratorë, oksigjen dhe monitorë. Gjithashtu është gati edhe ekipi mjekësor me mjekë dhe infermierë, të cilët kanë kryer edhe trajnimin disa mujor në spitalin Infektiv. Spitali Covid 3 fillimisht do të jetë një strukturë mbështetëse e dy spitaleve të tjera.
Pacientët të cilët përmirësohen nga ana klinike dhe negativizohen nga Covid, do të zhvendosen tek spitali Covid 3 për rehabilitimin e plotë pas sëmundjes. Të tre spitalet Covid kanë në total 470 shtretër, prej të cilëve 120 në spitalin Covid 1 në Shërbimin Infektiv, 200 në spitalin Covid 2 tek Sanatoriumi dhe 150 në Covid 3.
Kujtojmë se një ditë më parë ministria e Shëndetësisë tha se në dy spitalet Covid ishin të shtruar gjithsej 301 pacientë. Ndërkohë, vijon të rëndohet bilanci i viktimave. Dje, si pasojë e COVID-19 kanë humbur betejën me sëmundjen 3 pacientë duke e çuar në 502 numrin e personave që kanë ndërruar jetë që nga fillimi i pandemisë.
