Ministria e Shëndetësisë ka sqaruar si është situata në spitalet Covid 1 dhe 2 pasi shifrat e infektimeve janë rritur ndjeshëm gjatë ditëve të fundit. Në raportin ditor të 24 orëve të fundit, bën me dije se aktualisht në spitalin Infektiv dhe “Shefqet Ndroqi” po trajtohen 264 pacientë, 11 në terapi intensive nga të cilët 5 pacientë janë të intubuar.
Një ditë më parë, burime për Fax News bënë me dije se kapacitetet në spitalin Covid 1 dhe 2 janë drejt ezaurimit, ndaj ditën e hënë do të hapet Covid 3, godina e ish-Kirurgjisë për të trajtuar pacientët që kanë nevojë për shërbim spitalor. Situata në spitalin Infektiv në Tiranë duket se ka arritur pikën e vlimit, ku në ditët e fundit është vënë re një rritje e ndjeshme e numrit të urgjencave dhe personave që kërkojnë trajtim. Ditën e djeshme, në spitalin Infektiv kishte 30 shtretër të lirë, ndërsa tek “Shefqet Ndoqi”, 40, ndërsa prej kohësh mjekët janë duke punuar me sforco për përballimin e të gjitha rasteve.
Kujtojmë se sot u regjistruan 302 raste me COVID-19, ndërsa 4 persona humbën jetën, ndërkohë që numri total i jetëve të humbura që prej fillimit të pandemisë ka shkuar në 473. Një problem serioz përveç ezaurimit të kapaciteteve në spitale, mbetet dhe trajtimi i personave që kurohen në shtëpi, kostot e të cilëve nuk mbulohen nga ana e qeverisë.