Kryeministri Edi Rama reagoi sot lidhur me “Fake News” për mbetjet toksike, të cilin e konsideroi një akt të shëmtuar. “Çfarë shëmtie! Të paguash para të zeza për të përhapur në botë shpifje që sterrosin vendin ku të kanë bërë kryeministër, kryeparlamentar, president! Të blesh pisa të huaj për ta bërë pis atdheun ku shitesh si patriot i përvëluar. Pa Atdhe, pa din e pa iman”, tha Rama, duke ndarë shkrimin e publikuar nga një medie në vend, ku zbardhen dokumentet e mashtrimit të madh të vitit 2017. Sipas lajmit të publikuar nga Top News ministria e Brendshme italiane akuzon Sali Berishën dhe Ilir Metën, se kanë aktivizuar Ilir Kullën për të publikuar në Itali, një “Fake News” që të nxiste rënien e qeverisë së Edi Ramës në Tiranë”.
Ishte koha kur PD kishte ngujuar çadrën përpara kryeministrisë dhe Ilir Meta, aleat i Ramës po përgatitej të largohej nga koalicioni. Top News i referohet artikullit të Gazetës Shqip që ka siguruar dokumentet origjinale të Ministrisë së Brendshme të Italisë, e cila ka zbardhur të gjithë hetimin e zhvilluar pas një “Fake News” që u publikua në Itali në vitin 2017, sipas të cilit në Shqipëri kanë mbërritur 1400 kontenierë me mbetje toksike për t’u groposur në vendin tonë. “Sipas shkresës që është hartuar nga Drejtoria e Policisë Kriminale të Italisë, tashmë është vërtetuar se gjithçka ishte një sajim që u krye në bashkëpunim të ish-senatorit italian, Sergio de Gregorio dhe mikut të tij shqiptar Ilir Kulla”, thuhet në media.
Në shkresë thuhet se projekti që u zbatua nga Ilir Kulla, bëhej për llogari të Sali Berishës, ish-President dhe kryeministër i Shqipërisë. Por, shkresa e Policisë Kriminale italiane, thekson se Kulla, edhe pse vepronte për llogari të Berishës, ishte në dispozicion të Ilir Metës (në atë kohë kryetar i Kuvendit dhe aleat i Ramës në qeveri). Ndërkohë, lidhur me këtë lajm reagoi edhe zëdhënësi i Presidentit, Tedi Blushi, i cili shprehet se “Fake News-et’ që i publikon vetë përmes ish-avokatit në Romë, po i përdor për të shmangur vëmendjen e publikut nga aferat skandaloze të biznesit të ri qindra milion euro të Arbitrazhit Ndërkombëtar, që kërcënojnë seriozisht financat publike dhe taksapaguesit shqiptarë”.
Blushi thekson se “shkelja flagrante e Kushtetutës dhe e ligjeve, për të paguar me lekët e taksapaguesve shqiptarë, biznesin e ri kriminal, përbëjnë përgjegjësi të rëndë penale për çdo zyrtar të shtetit shqiptar. Asnjë formulë dhe marifet nuk e shpëton nga përgjegjësitë e rënda që ka për kriminalizimin e pushtetit dhe bllokimin e integrimit europian”.
