Është ndarë nga jeta në moshën 63-vjeçare violinistja e njohur e orkestrës filarmonike të Shkodrës Ruska Ruçi- Piraniqi. Ndarja e saj e parakohshme nga jeta ka pikëlluar shumë artistë dhe bashkëpunëtorë. Qyteti i Shkodrës ka humbur një nga artistët që me përkushtimin dhe punën ka lënë gjurmë në jetën artistike të qytetit të Shkodrës dhe më gjërë.

Kolegët dhe të afërmit e violinistes shprehen se gjatë gjithë jetës së saj ka rrezatuar mirësi, si në profesion ashtu edhe në jetën private. Ruska Ruci-Piraniqi lindi në Shkodër, mbaroi Shkollën e Muzikës, më pas Liceun Artistik në Tiranë. Ajo ka dhënë kontributin e saj në arsim por edhe në vatrat e kulturës së asaj kohe në rrethinat e Shkodrës si në Gur të Zi dhe në Juban, duke u bërë edhe drejtuese.

Ruska Ruçi ka qenë pjesë për shumë vite në orkestren filarmonike të Shkodrës, deri në vitin 1998. Më pas u zhvendos në Itali ku asnjëherë nuk e ndal punën e saj si instrumentiste.