Bashkia e Beratit do të fillojë së shpejti zbatimin e projektit “Accessible Tourism”.
Lajmi u bë i ditur nga kryetari i bashkisë së beratit, Ervin Demo, i cili theksoi se “projekti parashikon ndërhyrje pilot në “Lagjen Kala”, me përshtatje të parkimit e të sinjalistikës së nevojshme dhe mbi të gjitha me investime të tjera në infrastrukturë për krijimin e faciliteteve, për personat e moshuar dhe ata me aftësi ndryshe”.
Demo u shpreh se “gjithashtu parashikohen studime, informacion i detajuar nëpërmjet aplikacioneve dhe web-it, ndërhyrje në zyrën e informacionit turistik për të bërë të mundur që të vizitohet nga të gjithë, etj”.
Ndërkohë, vijoi ai, së shpejti fillon edhe zbatimi i projektit “Rikonstruksion dhe zgjerim i rrugës “Shën Ilias”.
Ky projekti fillon nga rruga kryesore e qytetit duke vazhduar drejt Kalasë.
“E nisim në Kala, si pika më e fortë turistike, por ne po punojmë fort që projektet t’i shtrijmë në të gjithë qytetin! Së shpejti me super projektet e radhës”, tha Demo.
Pjesë e Trashëgimisë Botërore të UNESCO-s, Berati vazhdon të jetë destinacioni i preferuar i shumë vizitorëve nga vendi dhe bota. Një interes të madh turistët kanë treguar për kalanë, Muzeun Ikonografik Onufri, Muzeun Etnografik, si dhe lagjet e vjetra e të qytetit: Mangalem e Goricë, si dhe Urën e Goricës. Në vitin 1961 Berati u shpall zyrtarisht qytet-muze. Sot Berati trashëgon 210 objekte muzeale, nga të cilat 150 janë objekte në këmbë. Prej tyre 60 janë monumente të kategorisë së parë dhe të tjerat të kategorisë së dytë.
Midis këtyre vlerave, nga më të spikaturat janë: Kështjella ose kalaja siç quhet nga beratasit, është ndërtuar mbi kodrën shkëmbore në formë trekëndëshi, me perimetër të mureve 1440 m, me 24 kulla e me dy porta.