Aktorja e mirënjohur shqiptare Luiza Xhuvani [Papadhanasi] lindi më 26 mars të vitit 1964 në qytetin e Sarandës dhe është një ndër aktoret e preferuara dhe të dashura të publikut shqiptar.
Xhuvani i përket atij brezi aktorësh që qenë pjesë e ndryshimit të madh si në artin ashtu edhe në mentalitetin shqiptar dhe këtë gjë e bëri duke dhënë kontribut të madh në artin dramatik si në teatër ashtu edhe në kinematografi.
Luiza Xhuvani u diplomua për aktore në “Akademinë e Arteve të Bukura” më 1986, menjëherë pas përfundimit të studimeve të larta ajo bëhet pjesë e Estradës së Sarandës ku punoj pë një periudhe dyvjeçare. Më pas ajo për shkak se spikati prej talentit dhe përkushtimit, emërohet si aktore pranë trupës profesioniste të “Teatrit Kombëtar”.
Ndërkohë që ende vazhdonte studimet për aktore, u angazhua duke interpretuar në produksionin kinematografik “Flutura në kabinën time” rol me të cilin fiton edhe Kupën për “Aktoren më të Mirë” në Festivalin e Filmit të vitit 1985. Menjëherë pas suksesit me rolin e Fluturës ajo interpreton në një tjetër film me titullin “Dhe vjen një ditë” ku sërish arriti të spikas fal talentit të saj ndërkohë që vazhdonte të studionte në vitin e dytë për aktore pranë “AAB”.
Disa nga rolet e saj më të spikatura: “Fjalë pa fund” (Magdalena) i S. Pecanit, “Hetimi vazhdon” (Hetuesja), “Rrethi i kujtesës” (Mbesa) i E. Musliut, “Muri i gjallë” (Rozafa) i M. Fejzos. Nga viti 1991 e në vazhdim ka një bashkëpunim të suksesshëm me regjisorin Gj. Xhuvani, nën drejtimin e të cilit interpreton në filmat “Bardhë e zi”, “Një ditë nga një jetë”, “Dashuria e fundit” (Mirjana), me të cilin fiton përsëri Kupën në Festivalin X të Filmit, më 1995, “Funeral Business” (Sana), me të cilin u shfaq në Festivalin e Venecias në vitin 2000, “Parullat” (Diana), me të cilin fiton Çmimin Aktorja më e mirë e Festivalit të Tokios 2003 dhe filmi “I dashur armik” (2004).
Në Teatrin Kombëtar interpreton vazhdimisht role protagoniste, si në dramat “Unë dhe Mefistofeli” (Margarita) të B. Hoxhes, “Dhelpra dhe rrushtë” (Klea) të Figueiredos, “Dasëm gjaku” (Nusja) të Lorkës, “Rikardi III” (Ledi Ana) të Shekspirit, “Kati VI” të Alfred Zheri, “Këngëtarja tullace” (Misis Martin) të Ioneskos dhe komeditë “Valsi i Titanikut” (Xhena) e “Oportunesku” të Mushateskut, “Kopshti me dallëndyshe” (Maria) të Cikliropulosit, “Armiku i popullit” (Pietra) të Ibsenit, “Pulëbardha” (Nina) të A,P,Çehovit, “Cilindri” (Rita) të De Filipos, regjisor Kastriot Çipi dhe “Kapitulli i dytë” (Xheni) të Sajmonit, regjisor Mehmet Xhelili me të cilin fiton çmimin për Aktoren më të mirë të Festivalit të Aktrimit, Apollon 2004, në Fier.
Jashtë kësaj skene, interpreton në produksionet e pavarura të dramave “Valle Vdekjeje” të Strindbergut dhe “Shërbëtorët” (Kler) të Zhenetit.atsh