Në 2 prill të 1939 Shqipëria u pushtua nga Italia fashiste, nën udhëheqjen e Benito Musolinit.
Asokohe vendi ynë ishte një monarki kushtetuese dhe drejtohej nga mbreti Zog.
Përkthyesi shqiptar Aurenc Bebja ka publikuar në blogun “Dars” deklaratën e mbretit Zog të dhënë për gazetën e vjetër franceze “Le Midi Socialiste, në 9 prill të 1940.
Shqipëria u mbajt e pushtuar nga Italia deri në vitin 1943, ku më pas u pushtua nga gjermanët deri në vitin 1944.
Deklarata e plotë:
“Me rastin e nënshtrimit të Shqipërisë nga Italia e Musolinit, zyra e shtypit shqiptar komunikon deklaratën e mëposhtme të mbretit Zog I :“Shqiptarët, si të gjithë popujt e tjerë, kanë të drejtën e shenjtë për të jetuar të lirë dhe të pavarur në tokën e të parëve të tyre. Shqiptarët, të drejtën natyrore dhe legjitime, e kanë shenjtëruar në sytë e botës nëpërmjet sakrificave të gjakut që ata kanë bërë gjatë një historie të vjetër disa mijëra vjeçare. Mbretëresha dhe unë, si të gjithë shqiptarët, i kushtojmë të gjitha mendimet dhe përpjekjet tona që kombi shqiptar të fitojë të drejtën për të jetuar në mënyrë të pavarur, e drejtë që bota e qytetëruar e ka njohur solemnisht. Jam plotësisht i bindur që Shqipëria, falë sakrificave të fëmijëve të saj dhe pozicionit gjeografik në Ballkan, do të shohë fundin e agresionit që i është shkaktuar dhe rikthimin e të drejtës së saj për një jetë të pavarur, në tërësinë e saj.”