Shkencëtarët kanë plotësuar dëshirën e një prifti egjiptian për jetë pas vdekjes. Sipas BBC, ata kanë rikrijuar zërin e tij me korda vokale artificiale.
Trupi i priftit Nesyamun ishte mumifikuar. Ai kishte jetuar rreth 3 mijë vjet më parë, gjatë sundimit të faraonit Ramses XI. Si prift, ai kishte nevojë për një zë të fortë për të kryer ritualet, ku përfshihet edhe këndimi.3 mijë vjet më pas, një ekip shkencëtarësh ia kanë risjellë zërin në jetë.
Ata e kanë bërë këtë duke riprodhuar një kuti zëri 3D, bazuar në traktin vokal të priftit dhe një sistemi tingujsh artificial të laringut. Mendohet se kjo është hera e parë që rikrijohet me sukses zëri i një personi të vdekur përmes mjeteve artificiale. Studimi është kryer nga një grup shkencëtarësh britanikë. Profesoresha Joann Fletcher tha se prifti e kishte shkruar në arkivolin e tij se donte që t’i dëgjohej zëri edhe pas të vdiste. “Në njëfarë mënyre, ne ia plotësuam dëshirën”, tha ajo.
