Jemi mësuar gjithmonë ta gatuajmë me gjethe rrushi, por sot do t’ju tregojmë sesi t’i gatuani me lakër të bardhë. Është akoma më i shijshëm dhe perfekt për stinën e vjeshtës…
Japraku është një gatim shumë i shijshëm dhe mjaft i shëndetshëm dhe ekonomik. Jemi mësuar gjithmonë ta gatuajmë me gjethe rrushi por sot do t’ju tregojmë sesi t’i gatuani me lakër të bardhë. Është akoma më i shijshëm dhe perfekt për stinën ku jemi ku gjethet e rrushit nuk janë më të pranishme.
Përbërësit për 6 persona:
1 kokë lakër e madhe
500 gr mish i grirë
2 gota uji oriz
1 qepë e thatë (e madhe)
1 lugë gjelle salcë speci ose domatesh
3-4 thelpinj hudhër
1 tufë majdanoz
Piper i zi
Spec i kuq
Mente e tharë
Kripë
Vaj ulliri
Përgatitja:
Lakrën e ndajmë në dy pjesë dhe e vemë në ujë me kripë të valuar që të zbutet. Pasi të jetë zbutur e heqim dhe e lemë të ftohet. Fletët e mëdha i ndajmë pa i prishur dhe i lemë veçmas për t’i përdorur më pas si mbështjellje. Qepën e grijmë hollë dhe e hedhim në një enë. Shtojmë orizin, salcën e tretur në pak ujë, mishin e grirë, majdanozin e grirë imët, piperin e zi dhe specin, kripë dhe pak ujë (1 filxhan kafeje). I përziejmë mirë me dorë. Marrim një nga fletët e lakrës dhe e shtrijmë për së gjati. Hedhim në njërin cep 1-2 lugë nga gjella e përgatitur. E mbështjellim në formë ruloje. Cepat mund t’i presim paksa nëse janë të gjatë. E lemë veç dhe e përsërisim këtë procedurë derisa të mbarojë gjella. Marrim një tenxhere dhe në fund të saj shtrijmë 3-4 fletë lakre të zier. Mbi to fillojmë të vendosim me rregull japrakët e përgatitur. Mund t’i rreshtojmë në 2 apo 3 shtresa derisa t’i zërë të gjitha. Në fund, sipër u hedhim thelpinjtë e hudhrës të shtypura lehtë me një lugë ose thikë. I hedhim rreth 1 gotë ujë, 2-3 lugë vaj ulliri dhe mente të tharë. Mbi japrakët vendosim një pjatë përmbys që t’i ruajë ato të mos hapen gjatë zierjes. Tenxheres i vemë kapakun dhe e vendosim mbi zjarr të mesëm që të ziejë përreth 30-40 minuta.
Kujdes: Nëse do të përdorim lakër të vogël, nuk e ndajmë në dy pjesë, por i heqim boshtin duke e prerë në formë rrethore. Gjatë mbështjelljes, evitojmë sa të mundemi damarët e trashë të fletëve. Nëse fletët janë të trasha, japrakët i ziejmë pak më tepër dhe i shtojmë ujë përsëri nëse duhet.