Avokati Lavdosh Shehu, i cili u arrestua pak ditë më parë me urdhër të SPAK, i akuzuar për “Ushtrim të ndikimit të paligjshëm te funksionarët”, ka apeluar vendimin e Gjykatës së Posaçme të Shkallës së Parë. Bëhet me dije se ai nëpërmjet avokatit ka depozituar ankimimin, duke kërkuar që masa “arrest me burg” të ndryshojë kundrejt garancisë pasurore.
Avokati është shprehur se ai nuk ka kryer asnjë vepër penale, pasi a proceduar komfor të gjitha rregullave ligjore, për ekstradimin nga Italia drejt Shqipërisë të shtetasit Fatos Hyseni , i dënuar me 30 vite burg për vrasje.
Sipas avokatit ai nuk ka ndërhyrë tek asnjë zyrtar i Ministrisë së Drejtësë. Sipas hetimeve të kryera nga SPAK rezulton se Shehu i ka marrë familjarëve të Fatos Hysenit 5 mijë euro nën premtimin se do e transferonin atë nga Italia në Shqipëri për të vuajtur dënimin, pasi sipas tij ai kishte aftësinë për të korruptuar funksionarë të Ministrisë së Drejtësisë. Shehu i kishte kërkuar atyre 12 mijë euro ku shumën prej 5 mijë eurosh e kishte marrë, ndërsa pjesën tjetër do e merrte kur të përfundonte puna.