Një tjetër ngjarje që mund të kishte pasur pasoja u parandalua nga Policia e Tiranës. Një 31-vjeçar ra në pranga pasi dhunoi fizikisht dhe kërcënoi me armë vëllain dhe dajën e tij. Në njoftimin e saj për mediat, policia thotë se kjo nuk ishte hera e parë që i arrestuari Iljaz Mecani, dhunonte familjarët e tij. Gjatë arrestimit, 31-vjeçarit iu gjetën në shtëpi edhe 2 armë zjarri.

“Falë ndërhyrjes në kohë, shërbimet e Policisë kanë arrestuar në flagrancë Iljaz Mecanin, 31 vjeç, banues në Tiranë, i dënuar më parë për vjedhje. Nga veprimet hetimore dyshohet se ky shtetas ka ushtruar dhunë fizike në mënyrë të përsëritur ndaj vëllait të tij dhe dajës së tyre, si dhe i ka kanosur ata me armë zjarri, për motive të dobëta. Gjatë kontrollit në ambientet e banesës së Iljaz Mecanit janë gjetur të fshehura 1 armë zjarri pistoletë, 1 armë zjarri automatik, 2 krehra dhe municion luftarak”, thuhet në njoftimin e policisë.