Faik Zeqja është 51-vjecari që u plagos ditën e sotme në Dibër. Aktualisht është jashtë rrezikut për jetën dhe po trajtohet për plumbin që ka marrë në këmbë. Por emri i tij nuk është i panjohur për drejtësinë shqiptare.
Kur ishte 48-vjeç, Faik (Fatjon) Zeqja u bë i famshëm për korruptimin e një prokurori. Zeqja arriti të nxirrte nga komisariati kamionin e bllokuar me dru falë një rryshfeti prej 200 mijë lekësh që ia dha prokurorit Tom Deda. Video u publikua nga një emision investigativ ndërsa Zeqjas policia i kishte bllokuar kamionin me dru, e për ta zhbllokuar kamionin pa dru ai i ka dhënë 200 mijë lekë prokurorit.
Fax News mëson se Faik Zeqja nga fshati Majtare i Dibrës është ndaluar nga policia pasditen e 5 tetorit 2016 në vendin e quajtur “Rrethrrotullimi i Maqellarës”, ku është kapur duke transportuar 3 metër kub lëndë drusore me kamionçinën e tij me targë AA 296 BC. Policia e Dibrës në atë kohë sekuestroi në cilësinë e provës materiale lëndën drusore dhe automjetin, ndërkohë që dosjen e poseduesit e dërgoi në prokurori për ndjekje penale në gjendje të lirë, pasi dyshohej për veprën penale “prerje e paligjshme e pyjeve”.
Pas dërgimit të dosjes në prokurori, Faik Zeqja që rezulton me 2 emra, ka kërkuar vetëm rikthimin e mjetit, jo të druve, pasi sipas ligjit kjo makinë ishte me dokumentacion të rregullt. Për këtë çështje, dy ditë pas ndalimit, qytetari thotë se ka kontaktuar me prokurorin Tom Deda, i cili ka qenë i gatshëm ditën e ngjarjes dhe kishte marrë dosjen e tij. Zeqja takon prokurorin Tom Deda, të cilit i jep 200 mijë lekë dhe më pas paraqitet në komisariat ku kamioni me dru shkarkohet dhe merr vetëm mjetin ndërsa lënda drusore mbahet në cilësinë e provës materiale. Kamioni i lirua me motivin se kishte dokumentacion të rregullt. Nuk ka asnjë të dhënë që ngjarja e sotme të ketë lidhje me çështjen ku 51 vjeçari është përfshirë disa vite më parë, ndërsa policia as në mënyrë zyrtare as jo zyrtare nuk ka dhënë asnjë informacion shtesë për ngjarjen e sotme.