Ish-kryeprokurori Adriatik Llalla, i dënuar me vendim të formës së prerë nga GJKKO, prej disa ditësh jeton në Itali dhe ka kërkuar azil politik në shtetin fqinj. Së fundmi Report ka publikuar disa pamje nga banesa ku po qëndron Llalla në një lagje të Romës. Më 12 dhjetor ai është paraqitur tek autoritetet italiane dhe ka kërkuar azil politik.

Por pas verifikimeve nga ana e autoriteteve, atij i është komunikuar masa e arrestit, për shkak se ish-kryeprokurori është në kërkim ndërkombëtar. Në Itali pritet një komunikim me Ministrinë e Drejtësisë së Shqipërisë për të nisur procedurat për ekstradimin e tij, procedurë e cila zgjat 40 ditë. Kujtojmë se hetimi ndaj Llallës nisi fillimisht nga Prokuroria e Durrësit më 15 mars 2018 nën akuzat e fshehjes së pasurisë, shpërdorimit të detyrës dhe pastrimit të parave. Ai u hetua edhe për veprën penale të “mosdeklarimit të shumave monetare në kufi”.