Një aksident automobilistik ka ndodhur mbrëmjen e sotme në qytetin e Lushnjes. Aksidenti ka ndodhur në lagjen Gafurr Muco në vendin e quajtur fabrika e miellit. Në aksident janë përfshirë dy mjete një tip Audi dhe një tip Mercedes Benz.
Nga informacionet e marra në vendgjarje, mësohet se mjeti tip Audi ka tentuar të parakalojë dy automjete njëkohësisht duke mos vënë re mjetin tip Benz i cili po kthehej në rrugën lindore të qytetit duke u përplasur e më pas kanë përfunduar në oborrin e një banese në anë të rrugës.
Si pasojë e aksidentit ka marrë dëmtime të lehta drejtuesi i automjetit Mercedes Benz ndërsa drejtuesi i mjetit Audi me targa të huaja është larguar nga vendngjarja duke braktisur mjetin. Policia e Lushnjes ka marrë në pyetje dëshmitarë dhe drejtuesin e mjetit Benz për të identifikuar personin që shkaktoi aksidentin.