Drejtoria e Policisë Durrës ka reaguar pas aksidentit ku mbeti i plagosur një këmbësor në qytetin bregdetar. Në njoftimin e parë është raportuar se i aksidentuari kishte humbur jetën, por sipas njoftimit të policisë, risjellë për këtë ngjarje sqaron se, personi i aksidentuar ndodhet në spital në gjendje të rëndë shëndetësore.
Policia bën me dije se drejtuesja e mjetit është shoqëruar në ambientet e Policisë, për veprime të mëtejshme procedurale.
Njoftimi i policisë:
Sqarim i Drejtorisë Vendore të Policisë Durrës:
Në lidhje me lajmin paraprak të dhënë paraditen e sotme, për një aksident rrugor, sipas të cilit, nga kontakti i menjëhershëm me vendngjarjen dhe nga konstatimet paraprake të shërbimeve mjekësore, i dëmtuari, shtetasi Y. H. (këmbësor) kishte humbur jetën, ju bëjmë me dije se:
Informacioni paraprak është lapsus, pasi shtetasi Y. H. nuk ka humbur jetën, por është në gjendje të rëndë shëndetësore.
Ndërhyrja e menjëhershme e shërbimeve mjekësore dhe asistenca e specializuar e ofruar nga ekipi mjekësor, ndaj këtij shtetasi, pas transportimit në spital, kanë bërë të mundur shpëtimin e jetës së shtetasit Y. H., i cili aktualisht ndodhet në gjendje të rëndë shëndetësore.
Shtetasi Y. H. ndodhet aktualisht në kujdesin e mjekëve, ndërsa shtetasja A. B., drejtuesja e automjetit që shkaktoi aksidentin, është shoqëruar në ambientet e Policisë, për veprime të mëtejshme procedurale.
Grupi hetimor vijon punën për zbardhjen e plotë të rrethanave të këtij aksidenti.
