Athina zyrtare ka reaguar pas vendimit të gjykatës së Vlorës për të lënë në burg kandidatin e koalicionit “Bashkë Fitojmë” në Himarë, Fredi Beleri.
Ministria e Jashtme greke e quan vendimin akt skandaloz, që nuk i takon shtetit të së drejtës dhe që sjell përmbysjen e rregullave të barazisë në zgjedhjet lokale në Himarë.
Po kështu Greqia paralajmëron se ky vendim do të ketë impakt negativ në marrëdhëniet e Bashkimit Europian me Shqipërinë.
“Vendimi i sotëm i gjykatës së Vlorës është skandaloz. Arrestimi i kandidatit për bashkinë e Himarës dy ditë përpara zgjedhjeve,nuk tregon shtet të së drejtës. Vendimi për burgosjen e kandidatit për kryetar bashkie, sjell përmbysjen e rregullave të barazisë në zgjedhjet lokale në Himarë, e cila është një qendër e rëndësishme e minoritetit etnik grek në Shqipëri. Një vendim ky që do të ketë impakt negativ në marrëdhëniet e Bashkimit Europian me Shqipërinë, pasi kusht për rrugën europiane të Shqipërisë është qëndrimi konstant i shteteve që aderojnë për anëtarësim, në rregullat europiane dhe në shtetin e së drejtës.
Vendime si i sotmi shkelin rregullat e mësipërme dhe tregojnë në realitet Shqipëria nuk po ndjek rrugën europiane”, shkruhet në deklaratën e Ministrisë së Jashtme greke.