Presidenti Ilir Meta ka reaguar me tone të forta në lidhje me ngjarjen e rëndë të mbrëmjes së djeshme, ku një sasi lëndë plasëse ishte vendosur pranë shtëpisë së presidentit të FSHF, Armando Duka. Në një postim në rrjetet sociale, Meta e cilëson këtë si një akt terrorist dhe bën thirrje të gjithë institucioneve ligjzbatuese të zbardhin me transparencë këtë ngjarje shumë të rëndë. “Dënoj me forcë aktin terrorist në familjen e Presidentit të Federatës Shqiptare të Futbollit, z.Armando Duka dhe u bëj thirrje të gjithë institucioneve ligjzbatuese të zbardhin me transparencë këtë ngjarje shumë të rëndë.
Një akt i tillë kriminal, në vijim të dhunës verbale, shantazhit dhe presioneve publike, shton emergjencën për ndalimin sa më parë dhe nxjerrjen para drejtësisë të frymëzuesve dhe autorëve.”-shkruan Meta