Verdi Morava, i cili është i dënuar për rekrutim luftëtarësh për ISIS-in në Shqipëri, këmbëngul se në burgje shkelen të drejtat e të dënuarve. Pas transferimit të tij në burgun e Burrelit, nga Peqini ku kishte qenë më parë, Morava shprehet se ndihet u persekutuar brenda qelisë, ku të gjithë të dënuarve u shkelen të drejtat më themelore. Morava është etiketuar si nxitës i grevës së urisë në burgje, dhe pretendon se është futur në izolim, edhe pse gjendja e tij shëndetësore ka qenë shumë e rënduar.
“Problemi nuk është thjesht personal, pasi edhe pse mua më kanë perseketuar pas peticionit që përpilova në burgun e Peqinit, që u pasua me reagime nga disa institucione të tjera të vuajtjes së dënimit, unë kisha kohë që e kisha përpiluar peticionin, që ia kishim dërguar qoftë ministres, qoftë Drejtorisë së Përgjithshme të Burgjeve. Ata kryejnë vepra penale të përditshme, janë 32 nene që shkelen, por një pjesë e tyre nuk ekzistojnë fare.
Vetëm mua, edhe pse isha shumë i sëmurë, më çuan në ambientet e izolimit për një javë, ku refuzova dhe ushqimin, e më pas nga Peqini më çuan në burgun e Burrelit. Ajo që është e rëndësishme është se nuk ka një dokument të shkruar për transferimin tim, dhe ajo që është më thelbësore, është se në peticionin tim nuk ka asgjë të paligjshme.
Së pari kërkoj të thuash drejtësi është pak, pasi të gjithë kërkesat janë të parashikuara në legjislacion, shteti shqiptar është i detyruar që të zbatojë të gjithë Konventat Europiane që kanë të bëjnë me të drejtat e të burgosurve. Çdo i dënuar gëzon të drejtat themelore, të cilat janë absolutisht të paprekshme”, u shpreh Morava.