Ministrja e Financave dhe Ekonomisë, Anila Denaj u ndal sot në Vlorë, për të zhvilluar një bisedim të drejtpërdrejtë me përfaqësues të biznesit. Sipas ministres Denaj, qëllimi i këtij takimi është për të dëgjuar problemet dhe shqetësimet e tyre teksa përpiqen çdo ditë të rimëkëmbin aktivitetin ekonomik, si dhe për ti njohur ata me skemat e nxitjes së punësimit që po zbatohen nga qeveria.
Një nga përfaqësueset e agjencisë së udhëtimeve që operon në këtë qytetet kryesisht me dy vendet fqinje, Itali e Greqi e njohu ministren me faktin se për shkak të situatës së krijuar prej COVID-19, që solli edhe kufizim të lëvizshmërisë është detyruar të shkurtojë numrin e punonjësve nga 49, në 15.
Ministrja e informoi atë se skemat e nxitjes së punësimit u vijnë në ndihmë bizneseve për të rikthyer punonjësit e tyre në punë. “Nëse ju merrni një punonjës nga ata që janë larguar, gjysmën e pagës minimale do ta financojë qeveria”, tha Denaj.
Denaj po ashtu tha se mbështetje në programet e nxitjes së punësimit ka edhe punonjësit e paregjistruar, të njohur si punonjës në të zezë. “Punonjësit informalë, ata që nuk paguajnë sot kontribute duke u futur te skema e tretë e nxitjes së punësimit, ajo 12-mujore, ku kontributet i paguan shteti si ato të punëdhënësit edhe ato të punëmarrësit, sigurojnë pensionin e tyre”, u shpreh Denaj. Sipas Denaj, programet e reja të nxitjes së punësimit janë një mundësi shumë e mirë që duhet të shfrytëzohen nga biznesi dhe ne i ftojmë të aplikojnë, pasi është shteti ai që merr përsipër të paguajë një pjesë të kostove të punës.