Borxhlinjtë e mëdhenj të bankave do të mbikëqyren nga Banka e Shqipërisë. Ndryshimet që miratoi së fundi Banka në rregulloren “Për administrimin e rrezikut nga ekspozimet e mëdha”, kërkojnë që bankat e nivelit të dytë të raportojnë çdo tre muaj për këta klientë.

Është fjala për ato biznese që kanë kredi me shuma të mëdha, vlera e të cilave prek kufirin e 10% të kapitalit rregullator të bankës. Sipas relacionit që shoqëron këtë rregullore, paralelisht, bankat duhet të raportojnë 10 ekspozimet më të mëdha ndaj institucioneve të mbikëqyrura, pavarësisht nëse arrijnë ose tejkalojnë ose jo 10% të kapitalit rregullator.

Ndryshimet në rregullore synojnë një kontroll më rigoroz mbi kreditë e mëdha të bankave, por edhe të ekspozimeve e tyre ndaj njëra-tjetrës, me qëllim shmangien e përcjelljes së goditjeve, sidomos në nivel të institucioneve me rëndësi sistemike. Rregullorja e re vendos edhe limite ekspozimi të bankave kundrejt njëra-tjetrës. Ky limit do të jetë raporti prej 15% ndaj kapitalit të nivelit të parë.

Bankat kanë nëntë muaj kohë që të përgatiten për këtë raportim, pasi rregullorja e ndryshuar hyn në fuqi në qershor të 2021.