Shtetet anëtare të BE-së ende nuk po arrijnë kompromis për projektbuxhetin europian deri në vitin 2027. Një numër shtetesh po kërkojnë të mos paguajnë më shumë se 1 për qind të prodhimit të brendshëm bruto kur është larguar edhe Britania e Madhe.
Brexit i ka krijuar Bashkimit Europian një hendek fiskal me vlerë 75 mld euro, të cilin liderët e unionit po debatojnë si ta mbushin në 7 vitet e ardhshme.
Katër vende të etiketuara si kursimtaret, Austria, Holanda, Suedia dhe Danimarka, kërkojnë që sasia t’i rimbursohet secilit shtet anëtar me qëllim zhvillimin e bujqësisë dhe ekonomisë kombëtare.
Presidenti i Këshillit Europian, Sharl Mishel, këmbëngul që të shpenzohet më shumë për politikat e klimës, emigracionit, sigurisë, dhe për shtetet anëtare me më shumë nevoja financiare.
“Dua të them se nuk e kuptoj pse jemi këtu, sepse propozimi i Sharl Mishelit është për një buxhet sa 1,074 për qind e prodhimit bruto të unionit, por disa kotributorë duan që të paguajnë maksimumin 1 për qind. Diferenca mes të dyjave është 75 miliardë,” deklaroi kryeministri çek Andrej Babish.
Homologia e tij daneze, Mete Frederiksen, u shpreh se mosmarrëveshjet mes vendeve ka pak gjasa të shoshiten gjatë samitit, dhe mund të nevojitet një tjetër takim muajin e ardhshëm.
Mosgjetja e konsensusit brenda fundvitit do rrezikonte ngrirjen e shumicës së projekteve të bllokut duke nisur nga viti 2021.
Kreu i Parlamentit Europian ka deklaruar se edhe nëse arrihet marrëveshja, eurodeputetët do e hidhnin poshtë projektbuxhetin në formën aktuale.
