Çmimi i bukës në Vlorë është rritur sot me 10 deri në 20 lekë. Buka e cila ka kushtuar 60 lekë është shitur me 70 lekë ndërsa ajo që ka kushtuar 120 lekë është shitur me 140. Qytetarët e Vlorës shprehen të revoltuar me rritjen e çmimeve ndërsa thonë se nuk po e përballojnë dot këtë situatë. “Që dje është rritur me 20 lekë. Tani vajti 100 lekë. Kjo është vdekje unë pensionist jam”  thonë ata

Të tjerë qytetarë që deri dje kanë blerë një bukë, tanimë marrin vetëm gjysmën e saj. Në vendin tonë prej më shumë se një jave mijëra qytetarë kanë protestuar anembanë vendit kundër rritjes së çmimeve, ndërsa i kanë kërkuar qeverisë që të ndërhyjë në treg për të stabilizuar situatën ose në të kundër duke nisur nga e shtuna ata do të nisin një protestë të pandërprerë para zyrës së kryeministrit në Tiranë.