Ish-deputeti Klevis Balliu është shprehur se dera e shtëpisë së tij është e hapur për të gjithë banorët e Astirit që sot rrezikojnë të mbeten në rrugë.
I pyetur nga gazetarët se çfarë do të bëjnë tashmë banorët e Unazës së Re, pasi do tu shemben banesat, Balliu tha se nuk e di.
“Nuk e di se ku do rrinë. Asnjë lekë s’do u kalojnë. Banorët seç do bëjnë nuk e di. Por unë do bëj gjithçka për t’ju përgjigjur atyre. Derën e shtëpisë time e kanë të hapur,”– tha Balliu.
Më tej ish-deputeti shtoi se çështja nuk qëndron vetëm te banorët e Astirit por tek largimi i kryeministrit Edi Rama nga pushteti.
“Dhunojnë qytetarët për Sandër kimikun që nuk e ka zgjedhur njeri. Ai është thjesht një i emëruar. Këtu është çfarë do bëjmë ne. Kemi një kriminel në pushtet të frymëzuar nga Millosheviçi. Ky duhet të shkojë në burg për këto krime makabre. Dje arrestuan një grua 70-vjeçe, sot e dhunuan, po të njëjtën grua këtu me gaz lotsjellës,”– vijoi ai.
Ndërkohë që IKMT-ja ka nisur shembjen e banesave sot në Astir. Në spitalin e Traumës kanë mbërritur tre efektivë policie dhe katër banorë të kësaj zone që kanë mbetur të plagosur.