Atletja shqiptare Luiza Gega ka shkëlqyer në shteg duke fituar të artën në vrapim 3000 metra me pengesa në Lojërat Mesdhetare.
Por Gega është befasuar për të keq në ceremoninë e medaljeve. Pasi mori medaljen e artë dhe vendosi në krahë flamurin shqiptar, Gega u bë gati për të nderuar himnin shqiptar.
Por organizatorët lëshuan himnin e një vendi tjetër. Gega mbeti e befasuar dhe kërkoi që të reagohet.
Ajo qëndroi në podium derisa përfundoi intonimi i himnit të gabuar, ndërsa insistoi që të lëshohet himni shqiptar. Kjo edhe ndodhi më pas.
Ashtu sikurse pritej, gara e 3000 metrave me pengesa në Lojërat Mesdhetare “Oran 2022” nuk dhuroi asnjë surprizë.
Luiza Gega i dhuroi medaljen e artë Shqipërisë në një garë të dominuar totalisht.
Gega realizoi një tjetër paraqitje fenomenale teksa vendosi edhe rekord të ri kombëtar me kohën 9:14.29, duke përmirësuar kështu rezultatin e një muaji më parë 9:15.48 që kishte arritur në Hengelo të Holandës.
Kjo është medalje e dytë e artë radhazi e Luiza Gegës në Lojërat Mesdhetare, asaj të “Tarragona 2018”, me atleten kuqezi që po kalon një formë të jashtëzakonshme.