Zbulohen të tjera detaje nga atentati me eksploziv ndaj Preng Gjinit, që tronditi dje pasdite kryeqytetin. Nga hetimet e bëra në vend, forcat xheniere, nisur nga matjet në mjet, dyshojnë se në këtë atentat është përdorur 400 deri në 500 gram eksploziv. Ndërkohë që mësohet se lënda plasëse ishte vendosur sipër gomës së parë, nga ana e pasagjerit, raporton “News 24”.
Për fat gjendja e të plagosurit është e qëndrueshme. Burime nga Spitali i Traumës thanë për News 24 se gjendja e 51 vjeçarit Preng Gjini paraqitet jashtë rrezikut për jetën. Gjini dëmtimet më të mëdha i ka marrë në pjesën abdominale, për shkak të të cilave ka kryer edhe ndërhyrje.
Por për fat, pavarësisht forcës së madhe shpërthyese, 51 vjeçari nuk ka marrë dëmtime shumë serioze, sepse i ka shërbyer si mburojë motori i makinës. Hetimet tregojnë se që nga vdekja e të vëllait, 51 vjeçari ka jetuar i fshehur, pasi i druhej një atentati. Pjesën më të madhe të kohës ka jetuar në Tiranë, ndërsa dy vajzat e tij dhe bashkëshortja jetojnë në Amerikë.
Ai kryente lëvizje shumë të pakta në kryeqytet dhe pjesën më të madhe të kohës ishte në shoqërinë e kushëririt të tij, që ka banesën shumë pranë vendit ku ndodhi shpërthimi. Mjeti ku ishte vendosur lënda plasëse është në pronësi të kushëririt të Gjinit. Atentatorët kanë pasur si objektiv sulmi pasagjerin e mjetit, që në të shumtën e ditëve ishte 51 vjeçari. Por, për rrethana që ende nuk dihet, mbrëmjen e djeshme ai lëvizi i vetëm në makinë, në pozicionin e drejtuesit të mjetit. Ndërkohë që dy të plagosurit e tjerë që ishin kalimtarë, italiani dhe 14 vjeçari kanë dalë nga spitali, pas mjekimit të parë që morën.