Kreu i kompanisë “Emaar”, Mohamed Alabbar, kompani e cila do të ndërtojë portin turistik të Durrësit, në një intervistë për CNN, e cilësoi këtë investim një ëndërr që do të bëhet realitet, ndërsa vlerësoi se Shqipëria ka gjithë indikatorët pozitivë për të tërhequr investimet e huaja.
“Europa e Re më duket shumë interesante. Kur hedh sytë nga Shqipëria dhe shikon përpjekjet e mëdha që qeveria po bën për ta çuar vendin përpara, patjetër që do dëshiroja të investoja i pari atje, sepse të gjithë indikatorët janë pozitivë, rritja e PBB-së dhe sektori i turizmit, një vijë bregdetare mahnitëse dhe një bregdet i pozicionar përballë Greqisë”, tha ai.
I pyetur lidhur nëse ky është fronti i dytë në Europën e re pas investimit në Serbi, Alabbar tha se i ka ndjekur me vëmendje këto vende që janë fantastike përsa i përket rritjes ekonomike, fuqisë punëtore dhe ajo që është më e rëndësishme, është se qeveritë e tyre punojnë ditë e natë për t’u bërë pjesë e Europës së vërtetë.
“Fatkeqësisht Shqipëria ka një të shkuar, për shkak të qeverisjes së atëhershme në vitet ‘90-të, por ky vend tashmë është pjekur, sigurisht jo brenda një dite dhe unë shikoj treguesit të cilët janë pozitivë dhe kjo gjë më shtyn që ndërmar një projekt madhështor dhe ndihem krenar që jam i pari që hedh këtë hap”, tha ai.
Alabbar vlerësoi “që procesi i rindërtimit po vazhdon në këtë vend dhe ne dëshirojmë të kontribuojmë jo vetëm në rindërtimin e vendit, por edhe për ta vendosur Shqipërinë në hartë për të ftuar investitorë të tjerë”.
“Sigurisht që ne po investojmë për të marrë fitimet tona, por edhe të nxjerrim në pah vlerat e këtij vendi, të qeverisë dhe të popullit”, shtoi ai.
I pyetur lidhur me investimin madhështor që do të zbatohet në një sipërfaqe prej 800 000 metrash katrorë, me komplekse banimi, hotele, zyra, model që është zbatuar në Dubai, Alabbar tha se e ka bërë në shumë vende dhe së fundmi në Serbi me projektin e stacionit të trenit i cili ishte shumë i suksesshëm.