Një ngjarje e rëndë ka ndodhur ditën e sotme në Bilisht ku një 21 vjeçar, Gevi Osmanllari, ka goditur me kaçavidë një 23 vjeçar.

Burime nga policia për Fax News bëjnë të ditur se i plagosuri ka marrë plagë të rënda në pjesën e qafës. Sherri mes të rinjve ka nisur fillimisht verbalisht më pas ka degraduar në perdorimin e kaçavidës. Dyshohet se ngjarja ka ndodhur për motive banale.

Njoftimi i policisë

Rreth orës 16.00, në qytetin e Bilishtit shtetasi Gevi Osmanllari, 21 vjeç, banues në Bilisht, dyshohet se gjatë një konflikti për motive të dobëta, ka plagosur me mjet të fortë (kaçavidë) shtetasin B.L, 23 vjeç, banues në fshatin Kuç i Zi, i cili është transportuar në Spitalin e Korçës, ku ndodhet në gjendje të rëndë shëndetësore.

Gjatë konfliktit, ka marrë dëmtime fizike edhe autori i dyshuar i ngjarjes, i cili pas ndihmës mjekësore ndodhet në Komisariatin e Policisë Devoll, ku po kryhen veprimet e mëtejshme proceduriale.

Po punohet për zbardhjen e plotë të rrethanave të ngjarjes.