Monedha e përbashkët europiane, euro ka regjistruar një javë pozitive në raport me Lekun ndryshe nga valutat e tjera që janë luhatur në këmbim me Lekun, gjatë javës 5 deri 11 tetor 2020. Sipas kursit zyrtar të Bankës së Shqipërisë, euro u këmbye në fundjavë me 124.1 lekë në raport me 123.98 lekë që këmbehej ditën e hënë.
Ndërsa monedha e gjelbër amerikane, nuk ka shënuar lëvizje të rëndësishme të vlerës gjatë 7 ditëve të fundit. Dollari amerikan e mbylli javën në kuotën e 105.21 lekëve ndaj vlerës 105.59 lekë që u këmbye ditën e hënë.
Paundi britanik pasi është rritur disi në tre ditën e para të javës ka pësuar rënie të lehtë në raport me Lekun, duke u ankoruar në fundjavë në kuotën e 136.1 lekë, më një rënie prej 0.6 lekë nga fillimi i periudhës së 5 deri 11 tetorit.
Franga zvicerane humbi terren gjatë kësaj jave. Monedha zvicerane këmbehet me 115.24 lekë ndaj 115.29 lekëve që u këmbye në fillim javë, ndërsa shënoi rënie të ndjeshme në vlerën 114.96 lekë në mes të javës.
Banka e Shqipërisë shprehet se kursi i këmbimit valutor është i qendrueshëm dhe i stabilizuar. Sipas BSH-së, kërkesë oferta e brendshme por edhe ecuria e bursave ndërkombëtare vijojnë të reflektohen në ecurinë e tij.