Eksportet e grupit “pjepra, shalqinj, papaja” u rritën në sasi me 39,1% gjatë gjysmës së parë të këtij viti, krahasuar me të njëjtën periudhë të vitit 2019. Sipas statistikave të publikuara nga Ministria e Bujqësisë dhe Zhvillimit Rural, gjatë periudhës janar-qershor të këtij viti u eksportuan 16 765 tonë pjepra, shalqinj dhe papaja nga 12 050 tonë që u eksportuan gjatë së njëjtës periudhë të 2019-s.

Referuar të dhënave, eksportet e shalqirit në harkun e 10 viteve të fundit u rritën me 10. 349 tonë. 20.829 tonë shalqi u eksportuan 2010. Ndërsa në vitin 2019, eksportet e shalqirit arritën 31.178 tonë, shifër kjo që e rendit Shqipërinë në vendin e 29-të në rang botëror për eksportet e shalqirit.

Sipas statistikave, zona e mbjellë me shalqi në vitin 2010 shënonte 5.488 ha kundrejt sipërfaqes prej 5 801 ha që ishte në vitin 2010. Ndërsa prodhimi i shalqirit u rrit 259 207 tonë në 2019, kundrejt 199.364 tonëve në 2010.

Rritja e prodhimit të shalqirit ka sjellë përmirësim pozitiv të bilancit tregtar për këtë kulturë. Eksportet e shalqirit “Made in Albania” kryesojnë në tregun rajonal, Kosovë, Maqedoni, Mali i Zi, Serbi por vitet e fundit po zgjerohet harta gjeografike edhe në vendet e BE-së, si Austri, Danimarkë etj