Në periudhën 2014-2019 nga Shqipëria janë larguar 12.5% shqiptarë më pak se sa në periudhën 2008-2013. Duke folur mbi shifrat e emigracionit gjatë eventit “Rruga drejt 25 Prillit – SHQIPËRIA E ARDHMJA, EMIGRACIONI E SHKUARA”, Kryeministri Edi Rama tha sot se “disa shifra të thjeshta flasin vetë”. “Këtu ne kemi lejet e qëndrimit në Bashkimin Europian, duke marrë parasysh shqiptarët që lëvizin. Në periudhën 2008-2013 kemi më shumë të larguar se në 2014-2019, ku kemi 12.5 %. Është dokument zyrtar”, tha Rama.
Duke iu referuar largimeve, Kryeministri theksoi se “në 2008 kemi afro 100 mijë njerëz të larguar në 1 vit”. “Trendi vjen në ulje deri në 31 279 të larguar në 2013. Pastaj ka një ringritje dhe vijmë në 2019. Kemi sidoqoftë një trend që qëndrueshëm me një zbritje, ringritje dhe pastaj stabilizim”, tha Rama. Kryeministri tha se “po të shohim të kthyerit, sepse ikin por edhe rikthehen, në periudhën 2014-2019 janë 49 790 të rikthyer, shifër që flet jashtëzakonisht shumë për një tjetër rikthim të rëndësishëm”.
“Po kjo e 30 viteve në Shqipëri është një nga ato fazat historike të ikjeve që kanë kaluar edhe vendet e tjera nga Italia fqinje, te Norvegjia, e cila nga fillimet e shekullit të shkuara ishte vendi më i varfër i Europës, vendi ku njerëzit vdisnin nga uria. Dhe në fund të shekullit të kaluar, Norvegjia hyri në një standard komplet tjetër dhe norvegjezët quhen sheikët e bardhë të Europës.
Vendet e tjera i kanë kaluar në kohë të tjera këto faza, që janë faza lënduese për çdo vend në shumë aspekte, por nuk janë të paevitueshme me forca të brendshme dhe nuk janë vetëm të këqija sepse falë emigrantëve vendet i kanë kaluar këto faza të vështira me mbështetjen ekonomike që u ka ardhur prej tyre nga jashtë, sepse përndryshe nuk do t’ia dilnin dot”, tha Rama.