Arrestohen pas tre muajsh dy autorët e dhunës ndaj gazetarit Elvis Hila dhe bashkëshortes së tij në Lezhë.
Policia bën me dije se ka vënë në pranga autorët Paulin Përgjini dhe Indrit Ameri, të cilët ishin shpallur në kërkim për dhunën ndaj gazetarit.
Shkak dyshohet se është bërë një lajm i raportuar nga gazetari i Lezhës, për një vendim gjykate. Autorët e morën në telefon dhe e kërcënuan, ndërsa më pas e dhunuan teksa po zbriste nga makina.
Njoftimi i Policisë:
Goditën për shkak të detyrës, një gazetar, ndalohen 2 autorët e dyshuar që ishin shpallur në kërkim.
Shërbimet e Komisariatit të Policisë Lezhë, në vijim të punës policore për kapjen e personave në kërkim për vepra të ndryshme penale dhe vënien e tyre përpara përgjegjësisë ligjore, gjatë ditës së sotme, kanë ndaluar shtetasit e shpallur në kërkim:
I.(E). A., 35 vjeç, banues në Zejmen dhe P.(L). P., 32 vjeç, banues në Manati.
Këta dy shtetas ishin shpallur në kërkim pasi Gjykata e Shkallës së Parë të Juridiksionit të Përgjithshëm Lezhë, ka caktuar ndaj tyre masën e sigurisë “Arrest në burg” për veprat penale “Goditje për shkak të detyrës” dhe “Plagosja e rëndë me dashje”, sepse më datë 25.01.2023, në Lezhë, kanë dhunuar fizikisht, për shkak të detyrës, shtetasin E. H., 32 vjeç, banues në Lezhë, me profesion gazetar, si dhe bashkëshorten e tij.
Materialet procedurale iu referuan Prokurorisë, për veprime të mëtejshme.