Lajme

Foto/ As makina e blinduar nuk i shpëtoi, mbi 100 plumba mbi automjetin ku udhëtonin shënjestrat e atentetit në Milot

Të paktën 100 plumba dyshohet të jenë zbrazur ndaj Klisman Preçit dhe Ylli Brahimit, mbrëmjen e së premtes në Milot gjatë një atentati brutal.

As fuoristrada e blinduar tip “Land Chrysler” me të cilën po udhëtonin viktimat, nuk ka mundur ti shpëtojë, pasi është bërë “shoshë”. Preçi ka humbur jetën, ndërsa Brahimi është plagosur.

Automjeti i blinduar me targa të Maqedonisë së Veriut, ka në xhamin ballor një sërë shenjash nga plumbat ndërsa duket se breshëria kryesisht ka ardhur nga pas ku gjurmët e plumbave duken akoma më shumë intensive.

Makina që drejtohej nga Preçi, i cili mbërriti i vdekur në spital dhe Ylli Brahimi po hynte në rrugicën që ndante banesat e tyre. Para se të futej në rrugicë, makina është qëlluar me breshëri plumbash.

Njoftimi i policisë: 

Në qytet Milot, në sheshpushimin e një pallati, rreth orës 21:00, është qëlluar me armë zjarri në drejtim të automjetit tip fuoristradë “Land Chrysler”, brenda të cilit ndodheshin shtetasit K. P., 28 vjeç dhe Y. B., 46 vjeç, banues në Kurbin, të cilët janë dërguar në Spitalin e Traumës, në Tiranë. Shtetasi K. P. ka ndërruar jetë.

Në vendngjarje kanë shkuar menjëherë forca të shumta policie dhe grupi hetimor.

Gjithashtu, nga forcat policore të Komisariateve të Policisë Kurbin dhe Lezhë, me mbështetje edhe nga grupet e FNSH Shkodër, po bëhet krehja e zonës dhe janë ngritur pika kontrolli, me qëllim kapjen e autorit/ëve.

Janë ngritur pika kontrolli në Rrugën e Kombit, në drejtim të Matit, të Lezhës, të Tiranës dhe të Krujës.

Në fshatin Gramëz, rrethi Krujë, është konstatuar duke u djegur një automjet, që dyshohet se është automjeti i përdorur nga autori/ët për kryerjen e kësaj ngjarjeje kriminale. Nga kqyrja paraprake, brenda tij, janë gjetur 2 armë zjarri kallashnikovë.

Grupi hetimor, nën drejtimin e Prokurorisë së Rrethit Gjyqësor Kurbin, vazhdon veprimet hetimore, duke administruar çdo provë, pamje filmike, informacion si dhe dëshmi, për zbardhjen e plotë të rrethanave të ngjarjes.

Artikuj të ngjashëm

Leave a Reply

Your email address will not be published. Required fields are marked *

Back to top button
Close