Pas 16 vitesh mungesë investimesh, është përuruar sot ura në fshatin Treblovë të bashkisë së Selenicës, në prani edhe të deputetit të Partisë Socialiste, Vullnet Sinaj. Deputeti Sinaj u shpreh se Ura e fshatit u bë realitet rreth një viti pas drejtimit të bashkisë nga ana e socialistëve ndërkohë që për 16 vite me radhë munguan investimet në këtë zonë. “Kjo urë i ka munguar Treblovës për 16 vite, por që kur Partia Socialiste ka marrë drejtimin e bashkisë së Selenicës gjërat po ndryshojnë. Gjej rastin të falënderoj kryetarin e bashkisë. Ajo që nuk u bë për 16 vjet, u bë për 6 muaj, se në kaq kohë ka punuar në kushte normale bashkia e Selenicës.
Mes vështirësive të ndryshme, siç janë tërmeti dhe pandemia u gjet mënyra të konkretizohej dhe përfundohej ky investim i bashkisë shumë i rëndësishëm për zonën. Do t’i ftoja të gjithë të vijnë këtu, të kalojnë në këtë urë dhe ta shikojnë detin nga Treblova, një mrekulli e vërtetë”, tha Sinaj. Nga ana e tij, kryetari i bashkisë së Selenicës, Pëllumb Binaj e cilësoi investim të munguar prej kohësh për banorët e Treblovës.