Prokuroria e Posaçme SPAK, ka patur një hetim sa i takon çështjeve të pasurive të krimit të organizuar, raporton “Top Channel”. Ky është një hetim mes SPAK dhe Antimafias italiane, ku është vendosur sekuestrimi i pasurisë së një shtetasi italian, i moshës 44 vjeç. Shtetasi Giovanni di Cosimo është kapur një vit më parë në qytetin e Durrësit, dhe konsiderohet si kreu i një klani mafioz në Bari.
44-vjeçari është arrestuar dhe i ekstraduar drejt Italisë. Nga hetimi financiar i kryer nga SPAK, ka rezultuar se ky shtetas teksa i fshihej drejtësisë italiane, në Shqipëri ka investuar në pasuri. Raportohet se është vendosur sekuestrimi për një fabrikë në qytetin e Durrësit, për disa toka dhe automjete, të cilat konsiderohen si pasuri të shtetasit në fjalë.
Sakaq, një ditë më parë, Prokuroria e Posaçme (SPAK) i ka kërkuar të dhëna shtesë strukturës së operacionit Forca e Ligjit në Policinë e Shtetit, për dy sekuestrot, kompleksin “Golden” të Altin Hajrit që është në kërkim për rrëmbimin dhe vrasjen e Jan Prengës, por edhe për makinën e blinduar që iu bllokua Saimir Taullaut.
Dy masat e vendosura nga policia në kushtet e emergjencës, i janë rikthyer përkohësisht policisë për veprime plotësuese në terren, me kërkesë të SPAK-ut. Duke iu referuar ligjit, pas 48 orëve nga vetëdeklarimi i subjekteve apo sekuestrove emergjente, dosjet kalojnë në SPAK dhe kjo strukturë ka 15 ditë kohë ta kalojë dosjen në gjykatë.