Gratë naftëtare në Ballsh ndodhen ne gjendje të rënduar shëndetësore dhe psikologjike, madje njëra prej tyre ka tentuar veprimin ekstrem për të prerë damarët. Greva e grave punëtore në Uzinën e Përpunimit të Naftës në Ballsh ka hyrë sot në ditën e 24-t. Përveç përkeqësimit të shëndetit, duket se gratë janë të dëshpëruara që ende për to nuk po jepet një zgjidhje.
Në ditën e 24 të grevës së urisë, gjendja e naftëtareve të Ballshit është rënduar. Teksa kërkojnë pagat e prapambetura, mbrëmjen e së premtes një greviste ka tentuar të vetëvritet, ndërsa shprehet se nuk i ka mbetur rrugë tjetër. Për Mimoza Muhametajn, mbrëmja e së premtes ka qenë mbrëmja më e zezë e jetës së saj, pasi ajo ka tentuar të vetëvritet. Ajo ka 36 vite punë si naftëtare në rafinerinë e përpunimit të naftës në Ballsh, ndërsa është në grevë urie prej 24 ditësh. “Nata më e zezë në jetën time, kam tentuar një moment vetëm ma ka hequr thikën nga dora shoqja që që kam në krah. Unë e vdekur që e vdekur jam, ku do të vete? Do mbahemi mend, do të vetëflijohemi! Mos ta marrë asnjë si shaka. Kryeministri paska thënë mbrëmë që na ka dhënë një shans, i vetmi shans që na ka dhënë është ngujimi. I lutem edhe Gramoz Ruçit që na premtuar shumë dhe asgjë nuk ka bërë. Flasin vetëm kur vjen koha për votimet. Jam shumë e ngarkuar emocionalisht dhe psikologjikisht. Do të vetëflijohemi, nuk ka ku të shkojë më. Jemi shumë të acaruara” deklaroi ajo.