Lajme

‘Hakërohet’ celulari i Presidentit Ilir Meta, do kërkojmë hetim ndërkombëtar

Zëdhënësi Tedi Blushi, përmes një deklarate për media, ka bërë me dije se për këtë rast do kërkohet hetim ndërkombëtar.

Këto akte të dëshpëruara- shton ai- kanë autorësinë e atyre të cilët i blenë dhe i vodhën mandatet e deputetëve më 25 prill dhe tani nuk po i gëzojnë dot.

Këto mesazhe janë dërguar drejt deputetëve të LSI dhe PD, mesazhe të ndryshme pakënaqësie me mënyrën si kanë vepruar në këto zgjedhje. Pasi deputetët kanë kthyer përgjigje kanë kuptuar që nuk është një mesazh i dërguar nga vetë Presidenti Meta, por numri zyrtar i telefonit personal ishte hakeruar.

E njëjta situatë ndodhi edhe me Kryedemokratin Basha vetëm pak muaj më pare. Në një mesazh drejtuar moderatores Eni Vasili, pretendohej se kreu demokrat i kërkonte që të pyeste Ramën nëse a do të ishte i gatshëm të jepte dorëheqjen dhe t’ja linte vendin atij. Moderatorja sqaroi live për publikun, me fakte, duke publikuar mesazhet nga telefoni i saj dhe njëkohësisht mesazhet nga telefoni i Lulzim Bashës. Në telefonin e këtij të fundit ky mesazh mungonte!

Deklaratë e Zëdhënësit të Presidentit të Republikës, Tedi Blushi:

Në emër të Presidentit të Republikës Sh.T.Z Ilir Meta dënoj me forcë konsumimin e veprës penale të keqpërdorimit të mesazheve telefonike, gjoja në emër të Kryetarit të Shtetit, nga disa persona të identifikuar, që sipas të dhënave të siguruara, kanë dërguar këto ditë mesazhe me përmbajtje fyese dhe kërcënuese në adresë të disa qytetarëve.

Këto akte të dëshpëruara, kanë autorësinë e atyre të cilët i blenë dhe i vodhën mandatet e deputetëve më 25 Prill dhe tani nuk po i gëzojnë dot.

Duke ju kërkuar ndjesë të gjithë qytetarëve, të cilët kanë marrë mesazhe të tilla, ju lutemi të na venë dijeni menjëherë.

Për këtë skandal kriminal të keqpërdorimit të numrit të Presidentit të Republikes do kërkohet hetim i menjëhershëm edhe ndërkombëtar, pasi nëse institucionet tona do të ishin funksionale askush nuk do të guxonte të bënte akte të tilla të çmendura dhe të dënueshme ligjërisht, që mund të venë në rrezik serioz edhe sigurinë kombëtare të Republikës së Shqipërisë, vend anëtar i NATO-s.

Falenderojmë ish-kryetarin e Bashkisë Berat, z.Petrit Sinaj, ish-kryetarin e Bashkisë Skrapar z.Nesim Spahiu, deputetin Lefter Maliqi, ish-deputeten Silva Caka dhe shumë të tjerë, që na informuan menjëherë.
Edhe njëherë ju kërkojmë ndjesë të gjithë qytetarëve për shqetësimet, që u kanë krijuar mesazhe të tilla, që kanë vetëm një përgjegjës: Organizatën Rilindja.

Është pikërisht kjo organizatë, që në mënyrë mafioze dhe të paligjshme rrëmbeu të dhënat personale të të gjithë qytetarëve për qëllime survejimi politik elektoral dhe shantazhimi.

Kur guxojnë të bëjnë një krim të tillë duke guxuar të fabrikojnë numrin zyrtar të telefonit të Presidentit të Republikës, ç’mund t’u bëjnë këta banditë qytetarëve të thjeshtë?

Artikuj të ngjashëm

Leave a Reply

Your email address will not be published. Required fields are marked *

Back to top button
Close
%d bloggers like this: