Karabinierët e Piacenzës kanë ekzekutuar sot një urdhër-arresti evropian për evazion fiskal të lëshuar në prill të vitit 2022 nga autoriteti gjyqësor i Tiranës. Si rezultat i operacionit ka rënë në pranga një 44-vjeçar italian, ndaj të cilit rëndon një dënim prej 5 vite burg.

Italiani, pronar dhe drejtor i një kompanie në Shqipëri, u dënua pasi nga marsi i vitit 2011, duke përfituar një shumë prej rreth 700 mijë eurosh, nuk ka paguar taksa dhe detyrime ndaj disa punonjësve të tij.

Policia e Piacenzas kishte marrë informata se 44-vjeçari ndodhej në atë territor dhe pas kontrolleve përkatëse, kanë arritur mëngjesin e sotëm ta kapin atë në një qendër në Borgonovë, ku ai shkonte herë pas here.

Ai u arrestua dhe u dërgua në burgun Novate, në dispozicion të Gjykatës së Apelit të Bolonjës për ekstradim në Shqipëri, ku do të vuajë dënimin.