Një 18-vjeçare është dërguar sot pa shenja jete në Qendren Emergjente në Ferizaj nga dy persona, të cilët janë larguar menjëherë nga aty. Dyshohet se ata e kanë sjell viktimën me një veturë të tipit Audi me tabela të Zvicrës por që numrat e tabelave nuk janë zbuluar ende për shkak të pamjeve të dobëta të kamerave të sigurisë. Nga kamerat e sigurisë së spitalit janë nxjerrë fotot e dy djemëve të cilët braktisën 18-vjeçaren të vdekur në derë të spitalit.
Mediat në Kosovë raportojnë se fotografitë janë shpërndarë në të gjitha pikat kuftare dhe drejtoritë rajonale. Rasti është bërë i ditur edhe nga kryeprokurori i Prokurorisë Themelore në Ferizaj Shukri Jashari, i cili tha se policia ende nuk ka arritur ta identifikojë viktimën.
“Dy persona e kanë sjell me një veturë të tipit ‘Audi’ me tabela të Zvicrës, tabelat për momentin nuk mund të deshifrohen. Fotografitë e të dyshuarve janë nxjerrë prej kamerave të sigurisë të spitalit, ende nuk dihet kush janë ata persona, mirëpo fotografitë e tyre janë nxjerrë dhe janë shpërndarë në të gjitha pikat kufitare dhe të gjitha drejtoritë të policisë së Kosovës”, ka deklaruar kryeprokurori.