Gazetari Artan Hoxha ka dhënë detaje nga sekuestrimi i një sasie prej 119 kg drogë në Vaqarr të Tiranës.
Ai ka sjellë pamjet e skanerit të kontinierit me ngarkesën me banane të kompanisë “Zico-Bana King”, i cili në skaner ka rezultuar i pastër.
Hoxha ka ngritur dyshime në lidhje me skanerin e kamionit , ku tha se ndryshe nga herët e tjera ai kësaj rradhe ka arritur të marrë në dorë pamjet e skenarit lehtësisht.
“E ke të zezë të plotë dhe këtu është një pjesë bosh, pjesa e bardhë është bosh. Çuditërisht herët e kaluara nuk më jepnin skanerat, ndërsa kësaj rradhe mi kanë dhënë qëllimisht. 113 arka mungojnë me banane, policia shqiptare ka kapur vetëm 7 dhe në ato 7 janë gjetur 119 kg hashash. 1925 kg, gati dy ton në 113 arka. Skaneri tregon që ka probleme brenda, ngarkesa nuk është e plotë. Arkat janë zbritur dhe më pas u gjetën te magazina.Skaneri ka nxjerrë që kamioni nuk ka gjë”, ka thënë ai.
Kujtojmë se Konteineri me ngarkesën me banane të kompanisë “Zico – Bana King”, ishte nisur nga Ekuadori dhe kishte kaluar tranzit në një port në Itali.
Autoritetet ligjzbatuese në vendin fqinj kanë konstatuar mungesën e plumçes (vulës) dhe për këtë arsye kanë ushtruar kontroll dhe kanë konstatuar mungesë të arkave me banane.
Pas këtij konstatimi kanë mbyllur dhe riplumbosur kontenierin duke e shoqëruar me procesverbalin përkatës. Konteineri ka mbërritur në portin e Durrësit për llogari të kompanisë “Zico – Bana King” dhe është zhdoganuar.
Kamioni i firmës i drejtuar nga shoferi Hasan Saliu e ka marrë ngarkesën me banane dhe kokainë dhe ka dalë nga porti, me destinacion magazinat e firmës në periferi të qytetit të Tiranës, në Vaqarr. Rrugës kanë ndodhur dhe shumë peripeci “të çuditshme”, por ato po ndiqen nga Prokuroria e Tiranës.