Tragjike ishte ngjarja në Itali, ku babai shqiptar vrau me thikë vajzën e tij 16-vjeçare, Xhesika, fqinjin e tyre italian si dhe plagosi gruan. 45-vjeçari Taulant Malaj, pretendonte se gruaja e tij e tradhtonte dhe mbrëmjen e së dielës, ai kreu krimin makabër. Në dëshminë e tij para oficerëve të policisë, shqiptari tha se gruaja e tradhtonte me 51-vjeçarin Massimo De Santis, të cilin kishte kohë që e kishte përfshirë në historinë e tradhtisë.
Hetuesia italiane ka zbardhur dinamikën e ngjarjes, pas këqyrjes së kamerave të sigurisë të cilat familja Malaj kishte instaluar në ambientet e brendshme të shtëpisë së tyre (sallon).
Sipas tyre, mënyra se si Taulant Malaj ka vepruar tregon një pandjeshmëri ndaj jetës njerëzore. Në pamjet filmike, hetuesit tregojnë që 45-vjeçari ka goditur vazhdimisht gruan dhe vajzën e tij me një qëllim të qartë; për t’i vrarë. Vajza është përpjekur që të mbronte nënën e saj, por është goditur nga i ati që në dhomën e gjumit ku ka filluar konflikti dhe për të vazhduar më tej dhe në sallon. Sipas ekspertizës, në trupin e saj janë gjetur katër plagë me thikë në gjoks, në vendin e organeve vitale.
Në raport shkruhet që; Malaj ka shkuar në dhomën e gjumit dhe ka goditur bashkëshorten e tij, e cila ka qenë në shtrat, duke i shkaktuar asaj plagë të shumta në pjesën e sipërme të trupit.
45-vjeçari është shprehur para hetuesve se pasi kishte vrarë Massimo De Santis, kishte shkuar në dhomën e gjumit për të vrarë bashkëshorten e tij, Tefta Malajn dhe në ato çaste fatale, ka ndërhyrë vajza e tyre 16-vjeçare. “Fatkeqësisht Jessica e gjeti veten në momentin e gabuar. Të dyja u arratisën nga shtrati në kuzhinë, ku unë vazhdova t’i godisja”, mësohet se është shprehur 45-vjeçari.
Djali i tyre 5-vjeçar ka parë të gjithë ngjarjen dhe siç raportohet deri më tani, ai është fshehur pas një divani. Malaj ka përdorur një thikë të gjatë 18 cm, sakaq Tefta Malaj, e mbijetuara nga kjo histori ka telefonuar ndihmën e shpejtë dhe i ka thënë me gjysmë zëri “thikë”, e pyetur nga operatori nëse ishte goditur dikush, ajo i është përgjigjur “po, po, vajza ime”. Taulant Malaj u arrestua në përpjekje për t’u larguar nga ngjarja.