Kryetarja e LSI-së Monika Kryemadhi ka zhvilluar sot një takim me të rinjtë në Devoll nga ku u shpreh se kryeministri Rama ka frikë nga presidenti Meta, pasi sipas saj presidenti nuk bën kompromis për pushtetin me kryeministrin.
“Meta nuk bën kompromis për pushtetin e Edi Ramës, për xhepat e oligarkëve të tij, për inceneratorët e tij, që paguan gazetarët për të hequr fjalën inceneratorë nga fjalori”, u shpreh Kryemadhi.
Duke iu drejtuar të rinjve, Kryemadhi tha se “gara jonë nuk është për ta bërë LSI forcë të parë në Devoll, në Korçë apo gjithë Shqipërinë”.
“Gara jonë është për të kthyer shpresën tek familjet shqiptare, për të rikthyer normalitetin ekonomik tek bizneset shqiptare, për të kthyer normalitetin në arsimin shqiptar, për të kthyer bujqësinë që është nga profesionet më të vështira dhe sot nuk ka asnjë vajzë apo djalë të ri të punojë në fushë sepse shpërblimi është jo vetëm qesharak por dhe fyes, e ndërkohë është një nga profesionet më të vështira. Në çdo vend të BE-së qoftë dhe te fqinjët tanë, profesioni i bujqësisë është një nga profesionet më të subvencionuara, por këtu konkurrenca bëhet e pandershme me produktet që vijnë nga vendet e rajonit apo vendet e tjera, ndërsa produkte shqiptare kalben”, tha ajo.
Kryemadhi tha se TVSH rëndon fermerët shqiptarë sikundër mungesa e subvencioneve, nafta që është më e shtrenjtë se në çdo vend të Europës, për të vazhduar më pas me mungesën e infrastrukturës, sistemin e vaditjes dhe sistemin e kullimit të cilët janë kthyer në një gangrenë për bujqësinë.
“Kryeministri foli sot për aeroportin e Kukësit, por më parë të flasë se si të shpëtojë patatet e Kukësit që të mos hidhen dhe kalben dhe të mos ndihmojë oligarkët që të sjellin produkte të tjera për të fituar miliona dhe të shkatërrojë ekonominë shqiptare, të flasë për të rinjtë dhe të reja që po ikin nga Shqipëria”, tha Kryemadhi.
