Mund të duket çudi, por Prokuroria e Përgjithshme kërkon 197 punonjës më shumë se sa ka aktualisht. Duke diskutuar për buxhetin e vitit 2019, në Komisionin e Ligjeve, përfaqësuesi i Prokurorisë së Përgjithshme Luan Abazaj, ka dhënë dhe shpjegimin se përse organi akuzës kërkon një rritje drastike të numrit të punonjësve.

Sipas tij 30 do të jenë oficerë të policisë gjyqësore, 100 sekretarë dhe 5 do jenë specialistë për dekriminalizimin.

“30 i duam oficerë të policisë gjyqësore. 100 sekretarë pranë çdo prokurori. 5 specialistë për dekriminalizimin, 30 ekspertë të fushave të ndryshme sipas ligjit të ri. Investimet do ti kryejmë deri në fund të vitit. Nuk djegim asnjë qindarkë”, ka thënë ai.

Mirëpo kjo shifër i është dukur absurde deputetit të PS-së Bashkim Fino, ai është shprehur se “kjo është si të ngresh nga e para institucionin e prokurorisë”.

“Shifër e frikshme. Ministria e Financave ka shtuar 50. Mua më duket absurde. Unë personalisht nuk do ta pranoja.

Ka pasur 130 milionë lekë për investim, por ka shpenzuar vetëm 52. Jua heqim fare. Ja japim një njeriu që di të investojë më mirë”, ka thënë Fino.