Procesi i vaksinimit për qytetarët mbi 70 vjeç po vijon me ritme të shpejta edhe në rrethin e Matit. Drejtoresha e Qendrës Shëndetësore në qarkun e Burrelit, mjekja Sheme Celami në një intervistë në një nga mediet në vend u shpreh se pas marrjes së dozës së parë të vaksinës nuk ka patur ndonjë rast me komplikacione.

“Procesi i vaksinimit po vazhdon shumë mirë. Nuk ka patur komplikacione, përveç një temperature të lehtë. Aktualisht kemi grupmoshën mbi 70 vjeç, pasi kanë përfunduar ata mbi 80 vjeç. Janë vaksinuar gjatë kësaj jave rreth 710 persona vetëm në Qendrën Shëndetësore të Burrelit”, tha Celami. Ndërsa në Krujë ka vijuar prej 3 javësh procesi i vaksinimit, ku deri më tani janë vaksinuar 2234 qytetare.

Shefi i epidemiologjisë pranë qendrës së Kujdesit Shëndetësor në Krujë, Ervin Karafili shprehet se procesi i vaksinimi ka vijuar normalisht sipas protokollit dhe se ka pasur një rritje të kërkesës për vaksinim nga qytetarët. “Vaksinimi po ecën mirë. Kemi mbaruar me fashën 90 vjeç plus. Jemi drejt përfundimit të fashës 80 plus dhe 70 plus”, tha Karafili.