Lajme

Meta në Shën Mitër Korona: Arbëreshët kanë dhënë kontribut të çmuar për përjetësimin e figurës së Skënderbeut

Presidenti i Republikës së Shqipërisë, Ilir Meta në një vizitë në Itali tek arbëreshët e Kolegjit të Shën Adrianit në Shën Mitër Korona në nderim të figurës së Gjergj Kastriotit Skëndërbeut, foli për rëndësinë e rilindasve në nderim të figurës së heroit kombëtar. I pranishëm gjatë takimit ishte edhe Presidenti i Italisë, Sergio Mattarella.

“Edhe pse larg mëmëdheut të tyre, komuniteti arbëresh krijoi dhe mbajti gjallë identitetin e vet kombëtar, i cili edhe sot pas 550 vitesh ruan me dashuri e fanatizëm gjuhën, kostumet, ritet, traditat dhe besimin. Ruajtja dhe kultivimi i identitetit kombëtar të arbëreshëve është një simbiozë unikale me integrimin e plotë të tyre me kulturën dhe shoqërinë italiane.

Ne u jemi mirënjohës pafundësisht arbëreshëve për kontributin e çmuar që kanë dhënë për kombin tonë: përjetësimin e figurës së Gjergj Kastriotit Skënderbeut ndër shekuj. Skënderbeu na bashkon të gjithëve ne shqiptarëve kudo në botë! Prandaj ne u jemi mirënjohës motrave dhe vëllezërve tanë arbëreshë që e ruajtën këtë figurë të lavdishme dhe bëmat e tij.

Komuniteti arbëresh mbetet sot ruajtësi i vetëm i gjuhës që Skënderbeu dhe bashkëluftëtarët e tij patën folur gjashtëqind vjet më parë. Ky është një thesar i madh për kombin tonë, për Italinë dhe trashëgiminë botërore. Është në interesin e dy popujve dhe vendeve tona të promovojmë këtë komunitet të vjetër e me vlera unikale si pjesë e pandashme e trashëgimisë historike shqiptare, italiane dhe europiane”, tha Meta.

 

Artikuj të ngjashëm

Leave a Reply

Your email address will not be published.

Back to top button
Close