Mona Lisa rikthehet në këndin e saj në muzeun e Luvrit në Paris pas dy muajsh pune për restaurimin e një prej veprave më të bukura të Rilindjes.
Më 16 Korrik, zyrtarët kishin zhvendosur kryeveprën e Leonardo Da Vincit në një tjetër galeri, duke krijuar për pasojë një dyndje të turistëve që kërkonin me çdo kusht të fotografonin të ashtuquajturën “Gioconda”. Situata kaotike detyroi autoritetet e muzeut që t’i jepnin prioritet turistëve që kishin blerë biletat online.
Konsideruar si vepra e artit më e famshme në botë, mendohet se është realizuar në Firence mes viteve 1503 dhe 1506 dhe besohet se është portreti i Lisa Gherardini del Giocondo. Edhe pse e restauruar, piktura nuk do të jetë pjesë e ekspozitës speciale e që Luvri po përgatitet të hapë gjatë këtij muaji me rastin e 500-vjetorit të vdekjes së Da Vincit.