/ATSH/- Autoriteti Kombëtar i Ushqimit, (AKU) ka intensifikuar  veprimtarinë për sigurinë ushqimore në vend, pas situatës së krijuar nga tërmeti i 26 Nëntorit. AKU bën të ditur se, për garantimin e shëndetit të banorëve të prekur, u ngritën trupa të posaçme inspektuese nga Drejtoritë Rajonale të AKU-së Tiranë, Durrës, Fier, Elbasan dhe Lezhë.

Gjatë periudhës 28 Nëntor deri 8 Dhjetor 2019 AKU  ka monitoruar dhe kontrolluar 395 pika grumbullimi të ndihmave ushqimore në zonën e Tiranës, Vorës, Kamzës, Durrësit, Shijakut, Sukthit, Krujës dhe Lezhës si dhe Hotelet apo Resortet ku janë strehuar personat e prekur nga tërmeti.

“Nga kontrollet e kryera janë konstatuar produkte ushqimore të cilat ruheshin në kushte të papërshtatshme dhe me afat të kaluar përdorimi. Për këte arsye nga ana e trupave inspektuese është marrë masa e bllokimit dhe më pas asgjesimit të sasisë prej 1727.5 kg produkte ushqimore si dhe 20 litra lengje”, citon njoftimi i AKU-së.