Naftëtarët e Ballshit po vijojnë në ditën e nëntë të protestës për shkak të pagave të pamarra prej disa muajsh. Gjendja e tyre shëndetësore është përkeqësuar ndërsa disa prej tyre kanë pasur probleme serioze me shëndetin. Me kërkesën e naftëtarëve, ka mbërritur një mjeke, e cila i ka dhënë ndihmë mjekësore grevistëve.
Kontrolli mjekësor bëhet sa herë që naftëtarët e kërkojnë dhe sa herë që nuk e ndiejnë veten mirë, megjithëse nuk ka një staf mjekësor që qëndron në gatishmëri.
Greva e naftëtarëve të Ballshit është në ditën e 9-të të saj dhe grevistët janë rënduar shumë nga gjendja shëndetësore. Për fat të keq në këto 9 ditë grevë urie nuk ka pasur asnjë reagim nga kompania private apo vetë shteti shqiptar. Punonjësit e rafinerisë vijojnë të kërkojnë pagat e tyre dhe rifillimin e punës sa më parë që të jetë e mundur. 12 naftëtarë dhe naftëtare vijojnë grevën e urisë në ambientin afër uzinës, por disa prej tyre ndodhen në gjendje të rëndë shëndetësore.
Sërish ditën e sotme ka pasur ndihmë mjekësore nga mjekët e spitalit të Ballshit, ku kujtojmë që stafi mjekësor ka ardhur pas 5 ditësh nga fillimi i grevës. Ata shprehen se kërkojnë vetëm një përgjigje, edhe sikur të jetë një përgjigje negative. Gjithashtu një prej grevistëve të Poçemit pritet të zëvendësohet nga kolegu i tij, pasi në orët e fundit gjendja e tij shëndetësore nuk ka qenë e mirë dhe ka nevojë për mjekim. E disata herë që naftëtarët protestojnë, futen në grevë urie dhe nuk marrin pagat e tyre apo sigurinë për rifillimin e punës. Deri më tani shteti i ka harruar, i ka lënë më mes të katër rrugëve dhe kujtohet për ta vetëm kur janë në fushatë elektorale. Prej 1 viti uzina e Ballshit nuk punon dhe naftëtarët janë pa paga sërish, vazhdon historia e tyre e dhimbshme, me shumë probleme dhe më e keqja pa zgjidhje.