Një përplasje fizike mësohet të ketë ndodhur mes kandidatit të PD-së për deputet, Luçiano Boçi dhe biznesmenit të peshkut, pronar i kompanisë “Rozafa”,  Gjergj Luca. Incidenti ka ndodhur në një lokal në Labinot të Elbasanit. Lidhur me këtë konflikt, të dyja palët kanë bërë kallzimet e tyre në prokurori.

Ky është një tjetër episod përplasje fizike gjatë fushatës zgjedhore, ndërkohë që para pak ditësh në Elbasan persona të dyshuar si të përfshirë në grupe kriminale, dhunuan disa militantë të opozitës, pasi ata brohoritën “Rama ik”. Boçi u shpreh për ABC News se, ishte në një takim elektoral dhe Luca i është afruar, e ka ofenduar, si dhe ka pasur përplasje fizike. Boçi, gjithashtu thotë se, gjatë përplasjes biznesmeni e ka kërcënuar me jetë.

“Isha në një takim elektoral në Labinot, ku z.Luca ka disa biznese. Kisha një takim me demokratët dhe ai është afruar duke më ofenduar dhe më pas ka pasur një përplasje fizike. Gjate përplasjes më ka kërcënuar me jetë. Menjëherë pas incidentit u jam drejtuar organeve ligjzbatuese për të kryer procedurat”, ka thënë Boçi.