Policia e Shtetit ka reguar për sulmin ndaj kreut të Partisë Demokratike, Sali Berisha.
Në komunikatën zyrtare, Policia e quan Berishën “deputet”, njëlloj siç e konsideron mazhoranca dhe thotë se personi që e ka qëlluar, Gert Shehu, ka precedentë kriminalë për plagosje, prishje të qetësisë publike dhe në fushën e narkotikëve.
Policia shton se ky person ka “çrregullime psikotike”, duke cituar si burim për këtë, familjarët e 31 vjeçarit.
Deklarata e Policisë:
Në lidhje me incidentin e ndodhur në orën 12:25, në tubimin e organizuar ditën e sotme, gjatë të cilit shtetasi G. Sh. goditi me grusht, deputetin S. Berisha, ju bëjmë me dije se: Specialistët për Hetimin e Krimeve të DVP Tiranë po kryejnë veprimet procedurale për shtetasin G. Sh., 31 vjeç, banues në Tiranë, për veprën penale “Goditje për shkak të detyrës”.
Nga verifikimet paraprake rezulton se 31-vjeçari ka precedentë të mëparshëm kriminal, për plagosje, prishje të qetësisë publike dhe në fushën e narkotikëve. Gjithashtu, sipas diagnozës klinike, të vënë në dispozicion nga familjarët e tij, 31-vjeçari vuan nga çrregullime psikotike dhe trajtohej prej vitesh, për këtë.
Hetimet po vijojnë, nën drejtimin e Prokurorisë së Tiranës, për të zbardhur plotësisht rrethanat e ngjarjes.
VIDEO: Momenti kur goditet Berisha